語音導遊介紹：1分48秒
「四樓有四仔，四仔無格仔！」
2000年代最經典的街頭叫賣聲，莫過於此。
位於登打士街和花園街交界的「好景商業中心」（簡稱好景），建於1983年。這座擁有29層高的商業大廈，地下至三樓為商場部份。好景的商店起初以售賣電玩為主，但自1990年代，「鹹碟舖」大量進駐，令好景成為旺角區「四大翻版黑點」之一，與先達廣場、星際城市和信和中心齊名。
不過，在「四大」入面，以好景最具特色：在好景地下，有一位被稱為「四仔教父」的大叔，他差不多每日都會在商場外，利用其獨特聲線高聲叫賣，堪稱旺角的「另類地標」。
以下讓我們重溫這位「四仔教父」的經典口號：
1. 內容精彩：
「要睇大肚，有大肚。要睇大波，有大波。埋嚟睇過揀過研究過。」
「喂，老友~經典場面，真人表現。」
「四級冇格，唔係還珠格格。」
「四級冇格，好過睇還珠格格。」
2. 經濟實惠：
「冇圈仔，冇格仔，好多毛毛睇。」
「擺低一嚿水，帶走五條女。」
「人一世物一世，買隻四仔最實際。」
「男嘅夠搏，女嘅夠索。」
3. 強身健體：
「四仔四級，化痰止咳。」
「得閒睇四級，化痰又止咳。」
「睇四級，醫風濕。」
「死老鬼，睇四仔，好過俾錢買偉仔。」（註：偉仔乃指「偉哥」）
「一百蚊四隻，越睇越大隻。」
4. 為人處世：
「招呼朋友睇四仔。」
「大個仔，睇四仔。AV女郎，無格仔。」
「埋嚟買四仔，唔買正傻仔。」
5. 老幼咸宜：
「四仔冇格仔，男女都啱睇。」
「四仔冇格仔，最啱學生睇。」
6. 其他良效：
「四仔無格仔，睇完大個仔。」
「三仔有格，四仔薄格，五仔冇格，睇完包你入型入格。」
「睇四仔，冇格仔。一家大細一齊睇，睇咗細路唔會曳。」
「唔買四仔，點中馬仔。」
7. 其他精彩金句：
「一百蚊三隻，冇花冇假冇格仔。」
「三仔超薄格，五隻賣一百。」
「三隻一百，四仔冇格。」
「四仔冇格仔，唔買都埋嚟睇睇。唔怕貨比貨，最緊要你識貨。」
「四仔係九樓，九樓有四仔。」
「五隻一百，四級冇格。」
「老人家，口花花，買套四仔益大家。」
「包清包靚，有壞包換。三級薄格，埋嚟揀埋嚟睇吓喇喂。」
「埋嚟睇埋嚟揀，幾蚊一隻翻版。」
「埋嚟睇埋嚟睇，冇遮冇掩冇格仔，最啱四眼仔。」
「新返新貨，五隻一百。」
「難得開到舖，買番三四套。」
後來，有關方面多次採取大規模的掃蕩行動，並查封商舖。加上，業主立案法團希望一洗商場的不雅形象，於是對構成滋擾的商戶興訟。當然，隨著互聯網迅速發展，令購買色情光碟的需求下降，結果令「鹹碟舖」絕跡。
現時，好景經已「洗底」成功，地下及一、二樓的舖頭主攻售賣電玩遊戲，以及年輕人貨品。至於樓上則是時裝店、波鞋店、嬰兒用品店和Band房等。
#香港 Hong Kong #旺角 Mongkok #歷史文化 history & culture #觀光 exploring and sightseeing